_ سلبيات كثيره في التعليم نلمسها نحن المعلمين عن قرب وكلها تشير الي أن هناك حاجه غلط يجب تقليص نظام التعليم في مصر منها؛ اذا كنت ولي أمر تلميذ وقررت أن تذهب للحجز لابنك عند اينشتاين الفيزياء في شهر ٧ يقولك انا قفلت مجموعاتي وبعد وساطات ومشاورات يقولك عشان خاطرك هدخله مجموعة مخصوص ٢٠ طالب ….
(( يبقى أكيد فيه حاجة غلط))
_ أيضا عندما يكون التعليم في السناتر والغرف وتحت بير السلم وعلى السطوح وأي مكان ما عدا المدرسة
(( يبقى أكيد فيه حاجة غلط))
_ أيضا عندما يصبح التعليم مهنة خريجي كل الكليات والمعاهد والدبلومات و مهنة من لا مهنة له
(( يبقى أكيد فيه حاجة غلط))
الدروس الخصوصية تبدأ من شهر ٧ والمادة الواحدة درسين وثلاثة
(( يبقى أكيد فيه حاجة غلط))
_ أيضا عندما يكون ابنك او بنتك يا دوب ياكل اللقمة ويطلع من البيت الظهر و يفضل يلف من سنتر ل سنتر ومن غرفة لغرفة لغاية ١١ ليلا ما تعرفش عمل ايه ولا اتلم على مين
(( يبقى أكيد فيه حاجة غلط))
_ أيضا عندما تكون مهمة الأم الأساسية تنظيم جدول الدروس والتجهيز للدروس وحل الواجب للدروس ومهمة الأب الأساسية الضرب في الأرض لتجهيز فلوس الدروس
(( يبقى أكيد فيه حاجة غلط))
_ أيضا عندما تروح تحجز لأبنك عند إمبراطور الكيمياء يقولك هيعمله اختبار الأول لأنه مبيقبلش الطالب الضعيف مع ان الدرس معمول أصلا للطالب الضعيف
((يبقى أكيد فيه حاجة غلط))
لكن _ ياسيادة الغفير
لما تقوم بمداهمات للقبض على المدرسين كالمجرمين يبقى بتعالج الغلط بالغلط
_ ولما تلغي دور المعلم تماما والاعتماد على المنصات التعليمية يبقى بتعالج الغلط بالغلط
_ أيضا عندما تصر ان المعلم يكون أقل الوظائف مرتب ومميزات يبقى بتعالج الغلط بالغلط
_ أيضا لما تنزع من المدرس كل الصلاحيات ويكون ملطشة لرؤسائه في العمل ومجلس الأمناء وأوليأء الأمور وحتى الطالب نفسه يبقى بتعالج الغلط بالغلط
_ أيضا عندما يكون عندك خريجين بالالاف وعندك عجز فى المدارس ولا تقوم بتعيينهم وتحمل العجز على المدرسين المعينين وتطلب خريجين يشتغلوا ببلاش من غير خبرة يبقى بتعالج الغلط بالغلط
_ أيضا عندما تظل المدارس متهالكة والمناهج عقيمة والامتحانات مهزلة يبقى بتعالج الغلط بالغلط
_ أيضا عندما يصبح الكتاب الخارجي افضل من الكتاب المدرسي وبعض المسئولين ياخدوا نسبة من المبيعات مقابل تأخير تسليم الكتب يبقى فيه حاجة غلط
_ وأخيرا…………….
ربنا يكفينا ويكفيكم شر التفكير الغلط والناس الغلط بس المهم محدش يفهمني غلط.👌
منقول
محمد دياب – موجه لغه انجليزيه
