سوريا تغيرت
رسالة دمشق
بقلم مظهر المخللاتي
كتير عالم عم تسألني كيف كانت تجربتي بالسفر بين المدن والقرى السورية، نهاراً أو ليلاً.
بصراحة، السفر بالنهار كان عادي وجميل جداً، الطبيعة خلابة، بس الملفت إنه المياه شبه معدومة. حتى البحيرات اللي مبينة عالخريطة، على أرض الواقع ما في ولا نقطة مي!
أكتر شي صدمني، هو وقت غلطت بالطريق وصرت قول: “الله يبعثلنا شي حاجز نسأله!”
تخيلوا، صرنا نعتبر الحواجز مصدر أمان!
من كم شهر بس، كان مجرد المرور جنب حاجز شي مخيف، والعالم كلها كانت تدعي عليهم…
هلأ عم نمر جنبهم وندعيلهم بالحماية!
عن جد، وقت شوف حاجز، بشعر بالراحة.
الطرقات صارت مضبوطة بنسبة كبيرة، ومعظم مداخل ومخارج القرى فيها حواجز أمنية،
والأهم من هيك، بكل الحواجز كانوا محترمين وودودين جداً، رغم إن سيارتي بلوحات مصرية، كانوا عارفين يتعاملوا وبيعرفوا تماماً شو لازم تكون أوراق السيارة الأجنبية.
هي السفرة علمتني كتير، وزرت فيها جزء كبير من سوريا،
وبكل صدق… سوريا تغيّرت
