كارثة في صورة ابتزاز ممكن يطولك انت او اهل بيتك، خلي بالك واقرا الكلام ده كويس اوي ..
ابلكيشن موجود على جوجل ستور اسمه “Money box”.
الابلكيشن ده عبارة عن ابلكيشن قروض، الفكرة العامة انه بيدي قروض صغيرة للناس من باب الفلوس السهلة يعني، هتلاقيه منتشر في الجروبات من نوع “عايز تكسب فلوس بسهولة ابعتلي خاص” والجو ده، وطبعا كلنا في عرض الجنية، فا مش خسرانين حاجة، ف بكل سهولة بنروح ننزله ونتبع الخطوات اللي هيا عبارة عن رقم محفظتك ومعلومات عنك وصورة بطاقتك وصورة سيلفي ليك واربع ارقام ثقة مقربين ليك ورسالة كونفرم والحاجات دي جميل؟
وبعد كدة بيعمل loading لحد ما يقولك تم التسجيل بنجاح ✅
وفجأة بتلاقي مبلغ نزل على محفظتك فعلا من غير ما تطلبه، اجباري، وانتا وحظك ممكن يبقا ١٢٠٠ جنية مثلا، لحد ما يعدي ٦ ايام بالظبط.
وهنا المصيبة بقا ..
هتلاقي ارقام واتساب بتكلمك تطالبك بتسديد ضعف المبلغ كفوايد وده بعد ٦ ايام بس، يعني لو ادوك ١٢٠٠ جنية هتلاقيهم بيطالبوا ب٢٤٠٠ جنية، ولو رفضت، فا لما البرنامج كان بيعمل loading هما سحبوا بيانات تليفونك كلها، ارقامك وحسابك عالفيس وصورك انتا واللي يخصوك من عالموبايل، وتبدأ لهجة التهديد والشتايم بقا، هتدفع ولا ننشر صورك ونبعتها لجهات اتصالك؟
لو عملت بلوك للرقم هتلاقي رقم تاني بيبعتلك، رقم تاني وتالت ورابع وارقام بتتصل بيك هدفها تخوفك وتشوه سمعتك، ونفس اللهجة والشتايم والابتزاز، وهتلاقي صورك اتركبت على صور عريانة وبيبتزك بأرقام وحسابات اقرب الناس ليك، وارقام اغلبها برة مصر يعني مش مرخصة ومفيش جهة قانونية تعرف تطاردهم.
طيب لو سددت؟ هتلاقي باقي الارقام بتهددك بردو كأنك مسددتش حاجة، وظيفتهم كلها انهم يسحبوا منك اكبر مبلغ ممكن، ولو سددت هينزلك قرض تاني بمبلغ اعلى اجباري، وبعد كام يوم هتلاقي نفس الابتزاز على ضعف الرقم اللي سلفه لك بالغصب، دايرة مابتنتهيش.
الفكرة ان اكتر المهددين والمستهدفين هما البنات اللي متصورة بشعرها او لنفسها عالموبايل وبيتم ابتزازها بالصور دي، او اي صور خاصة ليك او لحد يخصك، او اي محادثة مش عايز مديرك في الشغل يعرفها، او تهديد انك تتشتم بالام ويتقال عليك نصاب لمديرك في الشغل مثلا او اهل خطيبتك وهكذا،
فا لو عدى عليك الابلكيشن ده او اي ابلكيشن شبيه زي cash plus او غيره، متنزلوش، اللي قبلينا قالوا الحداية مبتحدفش كتاكيت، ولو حصل ونزلته اعملهم بلوكات ومتردش على اي ارقام خالص لحد ما يزهقوا، لانك بمجرد ما رديت بقيت صيدة سهلة ليهم.
شكل جديد من اشكال النصب والابتزاز فيه ارقام مصرية على مغربية محدش فيهم هيقدر ظروفك ومحدش فيهم موجود في مصر اصلا، خلي بالك و اوعى تنزله ولو عندك امسحه على طول.
تاني : متدوش بيناتكم لاي حد و لا حتي لو جه عن طريق أصحابكم المقربين ،
اسم الابلكيشن Money box
